Abituriyentlar uchun OTM va ta’lim yo‘nalishini tanlash boshlandi
Tanlov 8-avgustga qadar davom etadi.
Davlat oliy va professional ta’lim muassasalariga kirish test sinovlarida ishtirok etgan abituriyentlar uchun oliy ta’lim muassasalari va ta’lim yo‘nalishlarini tanlash jarayoni boshlandi.
Bilim va malakalarni baholash agentligining ma'lum qilishicha, abituriyentlar 2026-yil 25-iyuldan 8-avgustga qadar 15 kun davomida my.uzbmb.uz platformasining “Oliy va kasbiy ta’lim muassasalariga qabul” bo‘limi orqali o‘z tanlovini amalga oshirishi mumkin.
Dastlab abituriyentlar tanlov ustuvorligi va maqsadli qabul bo‘yicha tanlovni belgilaydi. Shundan so‘ng test topshirilgan fanlar majmuasi hamda ta’lim tiliga mos ravishda 5 tagacha oliy ta’lim muassasasi va ta’lim yo‘nalishini, shuningdek, ta’lim shaklini tanlaydi.
Ta’lim yo‘nalishlarini bitta yoki turli oliy ta’lim muassasalari doirasida tanlash mumkin. Tanlov yakunlangach, ma’lumotlar SMS orqali yuborilgan tasdiqlash kodi yordamida tasdiqlanadi va abituriyentning qayd varaqasi shakllantiriladi.
Abituriyentlar tanlov muddati yakuniga qadar o‘z ma’lumotlarini o‘zgartirishi hamda qayd varaqasini qayta yuklab olishi mumkin.
Talabalikka tavsiya etilgan yoki etilmagani haqidagi yakuniy natijalar ta’lim yo‘nalishlarini tanlash bosqichi to‘liq yakunlanganidan so‘ng bir hafta ichida e’lon qilinadi.
