Boysundagi texnogen avariyani bartaraf etishga Xitoy mutaxassislari jalb qilinadi
Tomonlar qutqaruv-burg‘ilash ishlarini tez fursatda boshlash hamda zarur texnika va mutaxassislarni obyektga yetkazishga kelishib oldi.
Boysun tumanidagi “Mustaqillikning 25 yilligi” konida yuzaga kelgan texnogen avariyani bartaraf etish ishlariga Xitoyning CCDC burg‘ilash kompaniyasi mutaxassislari jalb etiladi. Bu haqda “O‘zbekneftgaz” AJ axborot xizmati ma'lum qildi.
“O‘zbekneftgaz” AJ boshqaruv raisi Abdug‘ani Sanginov Xitoy milliy neft korporatsiyasi (CNPC) tarkibidagi CCDC burg‘ilash kompaniyasi vakillari bilan ishchi uchrashuv o‘tkazdi. Unda Boysun tumanidagi “Mustaqillikning 25 yilligi” konida yuzaga kelgan texnogen avariya oqibatlarini bartaraf etish ishlarini jadallashtirish masalalari muhokama qilindi.
Muloqot davomida avariyani bartaraf etish bo‘yicha amaliy ishlarni imkon qadar tez boshlash uchun tayyorgarlik jarayonlarini qisqa muddatlarda yakunlash zarurligi qayd etildi. Shu maqsadda obyektga maxsus burg‘ilash qurilmalari, yuqori bosim sharoitida ishlashga mo‘ljallangan texnologik uskunalar va boshqa zarur texnik vositalarni yetkazish, shuningdek, malakali mutaxassislarni jalb etish bo‘yicha kelishuvga erishildi.
Tomonlar qutqaruv-burg‘ilash ishlarini belgilangan muddatlarda boshlash hamda texnik yechimlarni tezkor qabul qilish uchun ikki kompaniya mutaxassislari o‘rtasidagi hamkorlikni yanada kuchaytirishga kelishib oldi.
Shuningdek, uchrashuvda texnogen avariya to‘liq bartaraf etilgach, neft-gaz sohasida yangi burg‘ilash va geologiya-qidiruv loyihalarini birgalikda amalga oshirish istiqbollari ham muhokama qilindi.
