Eron Trampning muzlatilgan aktivlar haqidagi bayonotini keskin qoraladi
Tehron bunday qadam davlatlar suvereniteti hamda xalqaro moliya tizimiga jiddiy putur yetkazishi mumkinligini ta’kidladi.
Eron Tashqi ishlar vaziri Abbos Aroqchi AQSH prezidenti Donald Trampning Eronning muzlatilgan xorijiy aktivlaridan foydalanish haqidagi bayonotini "o‘tga yog‘ sepish bilan barobar" deb baholadi. Uning aytishicha, bunday qaror xalqaro moliya tizimi va davlatlar suverenitetiga jiddiy putur yetkazishi mumkin. Bu haqda Aljazeera xabar berdi.
Avvalroq Tramp AQSH nazoratidagi Eron mablag‘lari mintaqadagi mojaro oqibatida yetkazilgan zararlarni qoplash uchun ishlatilishi mumkinligini bildirgandi. U bu mablag‘lar AQSH ixtiyorida ekanini va zarurat tug‘ilganda ulardan foydalanilishini aytgan.
Aroqchining ta'kidlashicha, agar bir davlat boshqa mamlakatning muzlatilgan aktivlarini o‘z xohishiga ko‘ra sarflashni boshlasa, bu xalqaro huquqning asosiy tamoyillarini izdan chiqaradi. Vazir bunday amaliyot kelajakda boshqa davlatlar uchun ham xavfli tajribaga aylanishidan ogohlantirdi.
Eron va AQSH o‘rtasidagi munosabatlar so‘nggi haftalarda yanada keskinlashgan. Harbiy to‘qnashuvlar, o‘zaro tahdidlar va iqtisodiy bosimlar fonida muzlatilgan Eron aktivlari masalasi ham ikki davlat o‘rtasidagi asosiy tortishuvlardan biriga aylangan.
