Eron Yevropa Ittifoqini ikkiyuzlamachilikda aybladi
Tashqi ishlar vazirligi Yevropa Ittifoqining Tehronga qarshi yangi sanksiyalarini keskin tanqid qildi.
Eron Tashqi ishlar vazirligi matbuot kotibi Bag‘ayining aytishicha, Yevropa davlatlari inson huquqlari himoyasi haqida tez-tez bayonot beradi, biroq uning fikricha, Isroil va AQSHning Eronga qarshi harbiy harakatlari oqibatida halok bo‘lgan tinch aholi va infratuzilmaga yetkazilgan zarar yuzasidan sukut saqlayveradi. Shu sababli u Yevropa siyosatini "ikki xil standart"ga asoslangan deb baholadi. Bu haqda Reuters xabar berdi.
Bag‘ayining bayonoti Yevropa Ittifoqi besh nafar eronlik sudya hamda Ashiyane kiberguruhi asoschisi Nima Solihiyga nisbatan inson huquqlari buzilishiga aloqadorlik ayblovi bilan yangi sanksiyalar joriy etganidan so‘ng berildi. Bryussel bu shaxslar Eronda ichki repressiyalar va axborotni cheklash bilan bog‘liq faoliyatda ishtirok etganini bildirgan.
Yevropa Ittifoqi tashqi siyosat bo‘yicha vakili Kaja Kallas esa dunyo e'tibori Yaqin Sharqdagi urushga qaratilgan bo‘lsa ham, Erondagi inson huquqlari bilan bog‘liq vaziyat e'tibordan chetda qolmasligi kerakligini ta'kidlagan. Uning so‘zlariga ko‘ra, YI inson huquqlarini buzishda ayblanayotgan shaxslarga nisbatan javobgarlik choralarini qo‘llash siyosatini davom ettiradi.
