Islom sivilizatsiyasi markazi haqidagi uchta hujjatli film xalqaro telekanallarda namoyish etildi

24-iyul kuni yetakchi xalqaro telekanallarda Yangi O‘zbekistonning yirik madaniy-ma’rifiy loyihasi — O‘zbekistondagi Islom sivilizatsiyasi markaziga bag‘ishlangan uchta hujjatli filmning ilk namoyishi bo‘lib o‘tdi. Filmlar «Rossiya 24», «Rossiya Kultura» va Euronews telekanallari orqali efirga uzatilib, ko‘p millionli auditoriyaga O‘zbekiston Respublikasi Prezidenti Shavkat Mirziyoyev tashabbusi bilan amalga oshirilgan ushbu loyihaning yaratilish tarixini taqdim etdi.

 

«Rossiya 24» telekanali Islom sivilizatsiyasi markazi hamkorligida «Masterskaya» kinokompaniyasi tomonidan suratga olingan 41 daqiqalik «Movarounnahr sivilizatsiyasi» hujjatli filmini namoyish etdi. «Rossiya Kultura» telekanali esa Markaz ishtirokida «DiVi» telekompaniyasi tomonidan tayyorlangan 39 daqiqalik «O‘zbekiston. Yangi koinot» hujjatli filmini efirga uzatdi.

 

Shuningdek, Euronews tahririyati ushbu betakror majmuaning yaratilish tarixi va xalqaro ahamiyatiga bag‘ishlangan maxsus 8 daqiqalik hujjatli filmni namoyish qildi. Mualliflik yondashuvlari va televizion formatlari turlicha bo‘lishiga qaramay, barcha uch filmni yagona g‘oya birlashtirib turadi. Unda O‘zbekiston Respublikasi Prezidenti Shavkat Mirziyoyev tomonidan 2017-yilda Birlashgan Millatlar Tashkiloti minbaridan ilk bor ilgari surilgan ulkan tashabbus haqida hikoya qilinadi. Ana shu tashabbus islom sivilizatsiyasi merosini o‘rganish, asrash va keng targ‘ib qilishga qaratilgan dunyodagi eng yirik markazlardan birini barpo etishga asos bo‘ldi. Hujjatli filmlarda loyihaning amalga oshirilish tarixi bosqichma-bosqich ochib beriladi.

 

Unda davlat rahbari tashabbusini ilgari surishdan tortib, qurilish ishlarining boshlanishi, majmuaning ochilishi, noyob muzey ekspozitsiyasining shakllantirilishi, bebaho madaniy boyliklarning Vatanga qaytarilishi, zamonaviy ilmiy-tadqiqot infratuzilmasining yaratilishi hamda «Islom sivilizatsiyasi: tinchlik, bag‘rikenglik va ma’rifat sari» mavzusidagi Birinchi xalqaro forumning o‘tkazilishigacha bo‘lgan jarayonlar yoritilgan.

 

Filmlarda loyihaning xalqaro e’tirofi ham alohida o‘rin egallaydi. Ularda davlat rahbarlari, xalqaro tashkilotlar rahbarlari, dunyoga mashhur olimlar va ekspertlarning O‘zbekistonning umuminsoniy madaniy merosni asrash, ilmiy hamkorlikni rivojlantirish va sivilizatsiyalar o‘rtasidagi muloqotni mustahkamlash borasidagi hissasiga bergan yuksak baholari keltirilgan.

 

Bir kunda uchta hujjatli filmning bir vaqtning o‘zida namoyish etilishi O‘zbekiston Respublikasi Prezidenti Shavkat Mirziyoyev tashabbusiga bo‘lgan xalqaro qiziqish tobora ortib borayotgani va uning jahon professional hamjamiyati tomonidan keng e’tirof etilayotganining yorqin ifodasi bo‘ldi. Har bir film ushbu loyihaning o‘ziga xos tarixini hikoya qiladi. Bugun u umumiy tarixiy merosga hurmat, ma’rifat va xalqaro hamkorlik ramziga aylangan.