Isroildagi o‘zbekistonliklar ogohlantirildi
Elchixona fuqarolarni xavfsizlik choralariga qat’iy rioya qilish va rasmiy ko‘rsatmalarga amal qilishga chaqirdi.
O‘zbekistonning Isroil Davlatidagi elchixonasi Yaqin Sharqdagi vaziyat keskinlashishi ehtimoli munosabati bilan mamlakatda yashayotgan va vaqtincha bo‘lib turgan O‘zbekiston fuqarolariga murojaat bilan chiqdi.
Elchixona fuqarolarni hushyorlikni kuchaytirish hamda shaxsiy xavfsizlik choralariga qat’iy rioya etishga chaqirdi.
Xususan, fuqarolarga Isroil davlat organlari, jumladan Home Front Command tomonidan berilayotgan rasmiy ogohlantirish va ko‘rsatmalarni muntazam kuzatib borish hamda ularga amal qilish tavsiya etildi.
Shuningdek, yashash yoki ish joyiga yaqin boshpanalar joylashuvini oldindan aniqlash, harakatlanishni rejalashtirishda ehtiyotkor bo‘lish, shaxsni tasdiqlovchi hujjatlarni doimo yonida olib yurish hamda yaqinlari bilan muntazam aloqada bo‘lish so‘raldi.
Elchixona zarurat tug‘ilganda fuqarolar quyidagi telefon raqamlari orqali murojaat qilishi mumkinligini ma’lum qildi:
Elchixona: 03-672-2466, 03-672-2371, 03-758-5075, 03-758-5076
Favqulodda holatlar uchun: +972 54 485 1397.
