“Men ketganimdan so‘ng barchangiz bankrot bo‘lasiz” — Tramp
AQSH prezidenti siyosiy faoliyati yakunlangach, ko‘plab Amerika ommaviy axborot vositalari bankrot bo‘lishini, chunki u haqida yozadigan boshqa shaxs qolmasligini aytdi.
AQSH prezidenti Donald Tramp siyosiy faoliyati yakunlangach, ko‘plab Amerika ommaviy axborot vositalari bankrot bo‘lishini aytdi.
Oq uy muxbirlari assotsiatsiyasi qabul marosimida nutq so‘zlagan Tramp, ommaviy axborot vositalarining faoliyati ko‘p jihatdan uning shaxsiga bog‘liq ekanini ta’kidlagan.
“Men ketganimda, barchangiz bankrot bo‘lasiz. Sizning biznes modelingiz ham yo‘q bo‘lib ketadi. Chunki yozadigan hech kim qolmaydi”, — degan AQSH prezidenti.
Trampning fikricha, Amerika ommaviy axborot vositalari asosan u haqida materiallar tayyorlaydi va siyosiy faoliyati tugaganidan keyin ular auditoriyasini saqlab qolishda qiyinchiliklarga duch keladi.
Shuningdek, u OAV vakillari o‘zi haqidagi xabarlarni asosan salbiy ohangda yoritayotganini ham ta’kidlagan.
Nutqi davomida Tramp hazil tariqasida prezidentlikdagi ehtimoliy uchinchi muddati yanada muvaffaqiyatli bo‘lishi mumkinligini ham aytib o‘tgan.
