Qashqadaryoda erkak o‘lgan itni Damas'ga bog‘lab sudradi
Ijtimoiy tarmoqlarda tarqalgan holat yuzasidan rasmiy munosabat bildirildi.
Qashqadaryo viloyatining Qamashi tumanida o‘lgan itni Damas avtomobiliga bog‘lab sudragan fuqaroga nisbatan ma’muriy hujjatlar rasmiylashtirildi.
Qashqadaryo viloyati IIBning ma’lum qilishicha, 24-iyul kuni soat taxminan 13:18 da Qamashi tumani “Quyi yangi” mahallasida yashovchi fuqaro o‘ziga tegishli Damas rusumli avtomashina bilan harakatlanayotib, yo‘l chetida nobud bo‘lgan itni ko‘rgan.
Aniqlanishicha, fuqaro hayvonni avtomobilning orqa qismiga bog‘lab sudrab ketgan. Holatni Qarshi–Shahrisabz avtomobil yo‘lida harakatlanayotgan boshqa haydovchilar ko‘rib qolgan hamda avtomobilni to‘xtatib, vaziyatga oydinlik kiritgan.
Mazkur holat yuzasidan huquqbuzarga nisbatan Ma’muriy javobgarlik to‘g‘risidagi kodeksning 111-moddasi asosida hujjatlar rasmiylashtirilgan va qonuniy baho berish uchun JIB Qamashi tuman sudiga yuborilgan.
Holat yuzasidan qo‘shimcha ma’lumot berilishi bildirilgan.
