Ruminiya havo hududiga kirgan yana bir dron yo‘q qilindi

 

Ruminiya prezidenti Nikushor Danning ma'lum qilishicha, dron mahalliy vaqt bilan soat 08:30 atrofida Dunay deltasi hududidagi Sfantu Georghe shahridan taxminan 10 kilometr g‘arbda urib tushirilgan. Operatsiya Ruminiya harbiy-havo kuchlari tomonidan amalga oshirilgan. Bu haqda Reuters xabar berdi.

 
Ruminiya Mudofaa vazirligi hodisa yuzasidan tergov boshlaganini bildirgan. Harbiylar dronning qoldiqlari topilgan hudud o‘rab olinganini va mutaxassislar uning kelib chiqishi hamda parvoz yo‘nalishini aniqlash ustida ishlayotganini ma'lum qilgam. Dastlabki ma'lumotlarga ko‘ra, qurbonlar va vayronagarchilik qayd etilmagan.

 
Bir kun avval ham Ruminiya F-16 qiruvchi samolyoti mamlakat havo hududini buzgan dronni urib tushirgandi. Prokuratura olib borgan dastlabki tekshiruv natijalariga ko‘ra, o‘sha dron Rossiyaga tegishli bo‘lishi mumkin. Bu Ruminiya Rossiya-Ukraina urushi boshlanganidan buyon o‘z havo hududiga kirgan dronni ilk bor urib tushirgani bo‘lgan.

 
So‘nggi yillarda Rossiyaning Ukrainadagi Dunay portlariga uyushtirgan zarbalari vaqtida bir necha bor dronlar va ularning parchalari Ruminiya hududiga tushgan. Shundan so‘ng mamlakat sharqiy chegaralarida havo mudofaasi kuchaytirilib, bunday holatlarda harbiy aviatsiya tezkor ravishda havoga ko‘tariladigan tartib joriy etilgan.