Toshkent aeroportida 11,8 kg gashish moyi musodara qilindi
Narkotik moddalar O‘zbekiston orqali qo‘shni davlatga tranzit tarzida olib o‘tilishi rejalashtirilgan.
Davlat xavfsizlik xizmati xodimlari tomonidan “Toshkent-Aero” ixtisoslashtirilgan bojxona kompleksi bilan hamkorlikda o‘tkazilgan tezkor-qidiruv tadbirlari davomida xorijdan olib kelingan yirik miqdordagi giyohvandlik vositasi musodara qilindi.
DXX ma'lum qilishicha, “Bangkok – Dehli – Toshkent” aviayo‘nalishi orqali poytaxtga uchib kelgan 2005-yilda tug‘ilgan Qirg‘iziston fuqarosi “yashil” yo‘lak orqali harakatlangan. Uning chemodanlari belgilangan tartibda tekshirilganda, shampun idishlariga yashirilgan 11,8 kilogramm gashish moyi borligi aniqlangan.
Tezkor tadbirning keyingi bosqichida mazkur giyohvandlik vositasi Yunusobod tumanidagi ko‘p qavatli uylardan biridagi xonadonga qoldirilgan. Uni olib ketish uchun kelgan 2001-yilda tug‘ilgan Chirchiq shahri fuqarosi ham qo‘lga olingan.
Dastlabki tergovga ko‘ra, ushbu giyohvandlik vositalari Tailanddan O‘zbekiston orqali qo‘shni davlatlardan biriga tranzit tarzida yetkazilishi rejalashtirilgan.
Mazkur holat yuzasidan gumonlanuvchilarga nisbatan Jinoyat kodeksining 246-moddasi 2-qismi (kontrabanda) bilan jinoyat ishi qo‘zg‘atilib, ularga nisbatan qamoq ehtiyot chorasi qo‘llanildi. Hozirda tergov harakatlari davom etmoqda.
