Toshkentda mast ayol yo‘lning qatnov qismiga yotib oldi
Ijtimoiy tarmoqlarda tarqalgan holat yuzasidan rasmiy ma’lumot berildi.
Ijtimoiy tarmoqlarda yo‘lning qatnov qismiga yotib olgan ayol aks etgan video yuzasidan rasmiy ma’lumot berildi.
Toshkent shahar IIBB ma’lum qilishicha, hodisa 2026-yil 25-iyul kuni soat taxminan 08:00 da Toshkent shahrining Yashnobod tumani, Beshariq ko‘chasida sodir bo‘lgan.
Dastlabki ma’lumotlarga ko‘ra, 1976-yilda tug‘ilgan fuqaro Ye.A. mast holatda yo‘lning qatnov qismiga yotib olib, transport vositalarining erkin harakatlanishiga xalaqit bergan hamda jamoat joyida yurish-turish qoidalarini qasddan buzgan.
Fuqaro bilan o‘tkazilgan suhbat davomida uning spirtli ichimlik ta’sirida ekani aniqlangan. Shundan so‘ng ichki ishlar va tibbiyot xodimlari tomonidan u 4-shahar klinik shifoxonasi hududidagi hushyorxonaga olib borilgan.
Mazkur holat yuzasidan Yashnobod tumani Ichki ishlar organlari tomonidan tergovga qadar tekshiruv ishlari olib borilmoqda. Tekshiruv yakunlariga ko‘ra, qonunchilikda belgilangan tartibda tegishli huquqiy qaror qabul qilinishi ma’lum qilindi.
