UNESCO Falastin va Livandagi tarixiy obidalarni Jahon merosi ro‘yxatiga kiritdi
Yaqin Sharqdagi mojaro sabab bu obyektlar xavf ostidagi meroslar ro‘yxatiga ham qo‘shildi.
Qaror Janubiy Koreyaning Pusan shahrida o‘tkazilgan UNESCOning Jahon merosi qo‘mitasi yig‘ilishida qabul qilindi. Qo‘mita Sebastiya va Mount Amel qal'alarini favqulodda tartibda ko‘rib chiqib, ularni bir vaqtning o‘zida Jahon merosi ro‘yxati hamda Xavf ostidagi Jahon merosi ro‘yxatiga kiritdi. Bunga Yaqin Sharqdagi davom etayotgan qurolli mojarolar sabab qilib ko‘rsatilgan. Bu haqda APnews xabar berdi.
Sebastiya Nablus shahri yaqinida, Isroil bosib olgan G‘arbiy Sohilda joylashgan bo‘lib, tarixchilar uni qadimgi Samariya - Bibliyada tilga olingan Isroil podshohligining poytaxti sifatida e'tirof etadi. Hududda temir davri, Rim, Vizantiya va islom davriga oid arxeologik yodgorliklar saqlanib qolgan. Shuningdek, xristian va islom an'analariga ko‘ra, Yahyo payg‘ambar shu yerda dafn etilgan.
Livandagi Mount Amel hududidan ro‘yxatga kiritilgan beshta qal'a esa salibchilar, Ayyubiylar, Mamluklar va mahalliy me'morchilik an'analarini o‘zida mujassam etgani bilan tarixiy ahamiyatga ega. Ular orasida Isroil qo‘shinlari joriy yil may oyida egallagan Beaufort qal'asi ham bor.
Isroil Tashqi ishlar vazirligi ushbu qarorni tanqid qilib, nomzodlar siyosiy maqsadlarda ilgari surilganini va Sebastiyaning yahudiy hamda xristian tarixini inkor etishga urinish ekanini bildirgan. Shuningdek, Isroil Beaufort qal'asi hududidan "Hizbulloh" harbiy maqsadlarda foydalanayotganini da'vo qilgan. Livan vakillari esa qal'alar 2000-yildan buyon faqat madaniy va turizm maqsadlarida foydalanib kelinayotganini ta'kidlagan. UNESCO esa barcha nomzodlar bir xil mezonlar asosida baholanishini va tashkilot siyosiy nizolar bo‘yicha taraf tutmasligini ma'lum qilgan.
