Yaponiya ikki nafar O‘zbekiston fuqarosini deportatsiya qildi
Biri texnik stajyor vizasi, ikkinchisi esa qisqa muddatli viza bilan Yaponiyaga kirib, ruxsat etilgan muddat tugaganidan keyin ham mamlakatni tark etmagan.
Yaponiya Immigratsiya xizmati mamlakat hududida noqonuniy yashab kelgan ikki nafar O‘zbekiston fuqarosini deportatsiya qildi. Bu haqda Yaponiyaning O‘zbekistondagi elchixonasi ma’lum qildi.
Qayd etilishicha, deportatsiya qilingan fuqarolardan biri Yaponiyaga texnik stajyor (Technical Intern Training Program) vizasi bilan kirgan bo‘lib, ruxsat etilgan muddat tugaganidan keyin ham mamlakatda noqonuniy qolgan. Ikkinchi fuqaro esa qisqa muddatli viza bilan kirib, vizasi muddati tugaganidan so‘ng ham Yaponiyani tark etmagan.
Har ikkala fuqaro keyinchalik Yaponiya huquqni muhofaza qiluvchi va immigratsiya organlari tomonidan ushlanib, O‘zbekistonga deportatsiya qilingan.
Elchixona noqonuniy yashash yoki noqonuniy mehnat faoliyati aniqlangan taqdirda qoidabuzarlar hibsga olinishi, immigratsiya markaziga joylashtirilishi hamda deportatsiya qilinishi mumkinligini eslatdi. Shuningdek, bunday shaxslar haqidagi ma’lumotlar O‘zbekistonning tegishli idoralariga ham yuborilishi qayd etildi.
