Yil boshidan buyon bolalarga nisbatan zo‘ravonlikka oid 8 ta jinoyat ishi qo‘zg‘atildi
2026-yilning dastlabki olti oyida Bolalar ombudsmaniga 1147 ta murojaat kelib tushgan.
Oliy Majlisning Bola huquqlari bo‘yicha vakili (Bolalar ombudsmani) 2026-yilning dastlabki olti oyidagi faoliyati yuzasidan brifing o‘tkazdi.
Ma’lum qilinishicha, hisobot davrida Bolalar ombudsmani nomiga 1147 ta murojaat kelib tushgan.
Murojaatlar asosida o‘tkazilgan o‘rganishlar natijasida bolalarga nisbatan zo‘ravonlik holatlariga oid 8 ta jinoyat ishi va 15 ta ma’muriy ish qo‘zg‘atilgan. Shuningdek, jinoyat ishini qo‘zg‘atishni rad etish haqidagi 6 ta qaror asossiz deb topilib, prokuratura tomonidan bekor qilingan va qayta o‘rganish uchun yuborilgan.
Hisobot davrida bola o‘z ixtiyori bilan chiqib keta olmaydigan muassasalarga 56 marotaba monitoring tashrifi amalga oshirilib, u yerda saqlanayotgan 1289 nafardan ortiq bola bilan yakka va jamoaviy suhbatlar o‘tkazilgan.
Bolalar huquqlari buzilishi holatlari yuzasidan jami 18 ta ta’sir chorasi qo‘llanilgan. Jumladan, 4 ta ogohlantirish, 7 ta taqdimnoma, 5 ta xulosa hamda 2 ta sud hujjati ustidan protest keltirish to‘g‘risida iltimosnoma kiritilgan.
Shuningdek, bola huquqlariga oid qonunchilikni takomillashtirish yuzasidan 43 ta normativ-huquqiy hujjat loyihasi bo‘yicha takliflar berilgan, bolalar huquqlarini targ‘ib etishga oid 1048 ta media material e’lon qilingan.
Bundan tashqari, Bolalar ombudsmani UNICEF bilan hamkorlikda 9500 nafardan ortiq bola ishtirokida ijtimoiy so‘rov o‘tkazgan. Xalqaro va milliy hamkorlar bilan olib borilgan ishlar natijasida esa 22 nafar bola xorijdan O‘zbekistonga qaytarilgan.
