Badaxshonda "Tolibon" va Ozodlik fronti o‘rtasida qurolli to‘qnashuv yuz berdi

Afg‘onistonning shimoli-sharqidagi Badashon viloyatining Zebak tumanida "Tolibon" kuchlari va Afg‘oniston Ozodlik fronti (AFF) o‘rtasida qurolli to‘qnashuv yuz berdi.

 

Amu TV xabariga ko‘ra, mahalliy manbalar janglar payshanba kuni kechqurun boshlanib, bir necha soat davom etganini bildirgan.

 

Ozodlik fronti siyosiy qo‘mitasi rahbari Dovud Najiy X ijtimoiy tarmog‘idagi sahifasida to‘qnashuvni "hal qiluvchi jang" deb atab, u yangi bosqichga o‘tganini ma’lum qildi.

 

"Tolibon"ning 219-Omar-e-Salis diviziyasi ham jang bo‘lib o‘tganini tasdiqladi. Guruh bayonotiga ko‘ra, chegara qo‘shinlari besh nafar hujumchini o‘ldirgan. Shuningdek, hujumchilar Zebak tumaniga Pokistonning Chitral hududidan kirib kelgani iddao qilingan.

 

Nashr har ikki tomonning qurbonlar soni va voqea tafsilotlari haqidagi bayonotlarini mustaqil ravishda tasdiqlay olmaganini qayd etgan.

 

Qayd etilishicha, Badaчshonda so‘nggi haftalarda "Tolibon"ga qarshi qurolli muxolifat faolligi kuchaygan. Avvalroq Milliy qarshilik fronti (NRF) o‘z jangchilari Yaftal-e-Payin tumanidagi ayrim davlat idoralarini bir necha soat nazorat qilganini ma’lum qilgan edi. "Tolibon" bu da’voni rasman tasdiqlamagan.

 

Xavfsizlik bo‘yicha tahlilchilar Badaxshondagi qurolli faollikning kuchayishini aholining "Tolibon" boshqaruvidan noroziligi, boshqaruv, etnik vakillik va tabiiy resurslar bilan bog‘liq mahalliy muammolar bilan izohlamoqda.