Xitoyda “Xunsya” tayfun sabab 700 mingdan ortiq aholi evakuatsiya qilindi
Guandun provinsiyasida kuchli shamol va jala yog‘ishi sabab favqulodda choralar kuchaytirildi.
Xitoyning Guandun provinsiyasi hukumati "Xunsya" tayfuni sabab 710 mingdan ortiq aholini evakuatsiya qildi. Bu haqda Gazeta.ru xabar berdi.
Ma’lum qilinishicha, eng ko‘p evakuatsiya Xuichjou va Shanvey shaharlarida amalga oshirilgan. Xuichjoudan 205 ming, Shanveydan esa 192 ming kishi xavfsiz hududlarga ko‘chirilgan.
26-iyul kuni Guandun provinsiyasiga yetib kelgan tayfun vaqtida shamol tezligi soniyasiga 45 metrgacha yetgan. Hozirda siklon shimol tomonga harakatlanib, asta-sekin kuchsizlanmoqda. Guandun, Szyansi va Xunan provinsiyalarida kuchli jala yog‘ishi yuzasidan ogohlantirish e’lon qilingan.
Qayd etilishicha, 19 ta shahar va 135 ta tumanda bo‘ron hamda suv toshqinlariga qarshi favqulodda choralar rejasi ishga tushirilgan. Bundan bir kun avval esa 340 ming kishi evakuatsiya qilingani ma’lum qilingan edi.
Shuningdek, Shantou, Shenchjen, Guanchjou va Dunguan shaharlarini o‘z ichiga olgan 12 ta shaharda "besh to‘xtatish" rejimi joriy etilgan. Uning doirasida korxonalar faoliyati vaqtincha to‘xtatilgan, maktablar va bozorlar yopilgan, jamoat transporti harakati cheklangan hamda qurilish ishlari to‘xtatilgan.
