“Energetikadagi muammo mablag‘da emas, tizimni boshqarishda” —Shavkat Mirziyoyev
Davlat rahbari iyun–iyul oylarida 4 mingga yaqin avariya sodir bo‘lgani oqibatida aholi va tadbirkorlar 8–10 soatgacha elektrsiz qolganini qayd etdi.
Prezident Shavkat Mirziyoyev yoqilg‘i-energetika tarmog‘ining ustuvor vazifalariga bag‘ishlangan videoselektor yig‘ilishida so‘nggi o‘n yilda energetika sohasida keng ko‘lamli islohotlar amalga oshirilgani, xususiy sektor va xorijiy investorlar uchun qulay sharoitlar yaratilgani hamda yirik loyihalar izchil qo‘llab-quvvatlanganini ta’kidladi.
Qayd etilishicha, ushbu davrda sohaga 23 milliard dollar xorijiy investitsiya jalb qilinib, hududlarda 9,5 gigavatt quvvatga ega elektr stansiyalari ishga tushirilgan. Shuningdek, elektr va gaz tarmoqlarini modernizatsiya qilish uchun 30 trillion so‘m yo‘naltirilgan.
Shu bilan birga, Prezident energetika tizimidagi asosiy muammo moliyalashtirishda emas, balki boshqaruv va mas’uliyatda ekanini qayd etdi.
“Ochiq aytish kerak. Energetikada muammo mablag‘da emas, chunki qancha kerak bo‘lsa, topib beryapmiz. Muammo tizimning boshqaruvida!”, — dedi davlat rahbari.
Yig‘ilishda Energetika vazirligi va uning quyi bo‘g‘inlaridagi ijro intizomi hamda nazoratning yetarli emasligi tanqid qilindi. Ta’kidlanishicha, ayrim hududlarda elektr tarmoqlaridagi yuklama oldindan to‘g‘ri baholanmagani sababli avariyalar soni ortgan.
Ma’lum qilinishicha, iyun–iyul oylarining o‘zida qariyb 4 mingta avariya sodir bo‘lgan. Natijada aholi va tadbirkorlar ayrim hududlarda 8–10 soatgacha elektr ta’minotisiz qolgan.
Prezident har bir uzilishning iqtisodiyot va tadbirkorlarga yetkazayotgan zarari chuqur tahlil qilinmayotganini tanqid qilib, energetika tizimidagi har bir rahbar faoliyati eng avvalo fuqarolar va biznes subyektlari hayotida ijobiy natija berishi lozimligini ta’kidladi.
