Eron Kiyevga zarba berishi mumkin — OAV
Taxminlar Eron TIV rahbarining Kaspiy dengizidagi Eron kemasiga qilingan hujum javobsiz qolmasligini bildirganidan so‘ng paydo bo‘ldi.
Al Jazeera telekanali Eronning Ukraina poytaxti Kiyevga dronlar yoki raketalar yordamida zarba berishi ehtimoli muhokama qilinayotganini ma’lum qildi.
Telekanalga ko‘ra, bunday zarba texnik jihatdan mumkin. Sababi, Tehron va Kiyev o‘rtasidagi masofa 2 ming kilometrdan kam bo‘lib, bu Eronning ayrim dron va raketa tizimlari imkoniyatlari doirasiga kiradi.
Mazkur taxminlar Eron tashqi ishlar vaziri Abbos Aroqchi Kaspiy dengizida Eron savdo kemasiga uyushtirilgan hujumni qoralab, bu holat javobsiz qolmasligini bildirganidan so‘ng paydo bo‘lgan.
Avvalroq Eron Tashqi ishlar vazirligi Ukraina Kaspiy dengizida Eronning savdo kemasiga hujum uyushtirgani oqibatida ekipajning bir a’zosi halok bo‘lgani, yana ikki kishi jarohat olganini ma’lum qilgan edi.
Ukraina Prezidenti Vladimir Zelenskiy esa o‘zining Telegram sahifasida Ukraina Qurolli kuchlari Kaspiy dengizida Erondan Rossiyaga harbiy yuk tashishda foydalanilgan kemalarga zarba berganini bildirgan.
Hozircha Eron tomonidan Kiyevga zarba berilishi yuzasidan rasmiy qaror yoki amaliy harakatlar haqida ma’lumot e’lon qilinmagan.
