“Hududiy elektr tarmoqlari” rahbari ishdan olindi
Yangi energetika vaziri, “Hududiy elektr tarmoqlari”ning yangi rahbari hamda Energiya inspeksiyasining yangi boshlig‘i bugundan boshlab mutlaqo yangicha ish uslubini yo‘lga qo‘yishi lozimligi ta’kidlandi.
Prezident Shavkat Mirziyoyev raisligidagi videoselektor yig‘ilishida energetika tizimidagi jiddiy kamchiliklar tanqid qilinib, qator rahbarlarga nisbatan kadrlar bo‘yicha qarorlar qabul qilindi.
Yig‘ilishda Surxondaryo viloyatida qurilayotgan bug‘-gaz elektr stansiyasi uchun joy noto‘g‘ri tanlangani qayd etildi. Ta’kidlanishicha, buning oqibatida stansiyaga gaz yetkazib berish uchun qo‘shimcha 300 million dollar sarflash zarurati yuzaga kelgan.
Shuningdek, tashabbuskor bilan tuzilgan shartnoma shartlari yetarlicha puxta o‘rganilmagani qo‘shimcha xarajatlar yuzaga kelishi xavfini oshirgani ta’kidlanib, mas’ullarga hujjatlarni qayta ko‘rib chiqish topshirildi.
Tizimdagi jiddiy kamchiliklar uchun energetika vaziri hamda “Hududiy elektr tarmoqlari” rahbari lavozimidan ozod etildi.
Bundan tashqari, “Milliy elektr tarmoqlari”, “Issiqlik elektr stansiyalari”, “Transgaz” va “Hududgaz” rahbarlariga yil yakunigacha sinov muddati belgilandi. Davlat rahbari natija bo‘lmagan taqdirda ular ham lavozimidan ozod etilishi haqida ogohlantirdi.
Yig‘ilishda yangi energetika vaziri Sherzod Xodjayev, “Hududiy elektr tarmoqlari”ning yangi rahbari Sardor Isaqulov hamda Energiya inspeksiyasining yangi boshlig‘i Axad Isoqjonov bugundan boshlab mutlaqo yangicha ish uslubini yo‘lga qo‘yishi lozimligi ta’kidlandi.
Prezident, shuningdek, hududlar rahbarlari ham energetika masalalariga befarq bo‘lib o‘tira olmasligini qayd etdi.
“Hokimlar ham ‘Bu energetiklarning ishi’ deb xotirjam o‘tirishga haqqi yo‘q. So‘rov qattiq bo‘ladi”, — dedi davlat rahbari.
