Ispaniyada jazirama oqibatida 3 800 dan ortiq odam vafot etdi
2026-yilning birinchi yarmi mamlakatda so‘nggi 65 yil ichidagi eng issiq davr bo‘ldi.
Ispaniyada 2026-yil boshidan buyon kuzatilayotgan jazirama issiq oqibatida 3 800 dan ortiq kishi vafot etdi.
Bu haqda Ispaniya Bosh vaziri Pedro Sanches Madrid shahrida bo‘lib o‘tgan tadbirda ma’lum qildi.
Uning so‘zlariga ko‘ra, joriy yilda mamlakatda yuz bergan o‘rmon yong‘inlari qariyb 150 ming gektar hududni qamrab olgan. Yong‘inlar oqibatida 13 kishi halok bo‘lgan.
Pedro Sanches iqlim o‘zgarishlari, avvalo, aholining eng zaif qatlamlariga salbiy ta’sir ko‘rsatayotganini ta’kidlagan. Uning qayd etishicha, yuqori harorat ayniqsa keksalar, bolalar, ochiq havoda mehnat qilayotgan fuqarolar hamda surunkali kasalliklarga chalingan insonlar uchun katta xavf tug‘dirmoqda.
Avvalroq Ispaniya meteorologiya xizmati 2026-yilning birinchi yarmi so‘nggi 65 yil ichidagi eng issiq davr bo‘lganini ma’lum qilgan edi. Shuningdek, joriy yilning iyun oyi kuzatuvlar tarixidagi ikkinchi eng issiq iyun sifatida qayd etilgan bo‘lib, o‘rtacha havo harorati iqlim me’yoridan 3,2 darajaga yuqori bo‘lgan.
