Kongoda Ebola bilan kasallanganlar soni 3 200 nafardan oshdi
Epidemiya asosan mamlakatning sharqidagi Ituri viloyatida avj olmoqda.
Kongo Demokratik Respublikasi sog‘liqni saqlash organlari ma’lumotlariga ko‘ra, mamlakatda Ebola virusi bilan kasallanganlar soni 3 200 nafarga, vafot etganlar soni esa 1 405 nafarga yetgan. Bu so‘nggi bir sutka ichida yana 125 ta yangi holat va 51 ta o‘lim qayd etilganini anglatadi.
Mutaxassislarning ta’kidlashicha, epidemiya asosan mamlakatning sharqidagi Ituri viloyatida avj olmoqda. Qurolli guruhlar faoliyati, xavfsizlik bilan bog‘liq muammolar hamda tibbiyot xodimlariga uyushtirilayotgan hujumlar kasallikni jilovlash ishlarini jiddiy qiyinlashtirmoqda.
Jahon sog‘liqni saqlash tashkiloti ushbu epidemiya hali ham kengayish bosqichida ekanini bildirgan. Vaziyatni yanada murakkablashtirayotgan omillardan biri kasallikni keltirib chiqargan Bundibugyo turidagi Ebola virusi uchun hozircha tasdiqlangan vaksina yoki maxsus davolash usuli mavjud emas. Shu sababli mutaxassislar infeksiya tarqalishini to‘xtatish uchun bemorlarni tezkor aniqlash, ularning yaqin aloqalarini kuzatish va qat’iy sanitariya choralarini kuchaytirishga urg‘u bermoqda.
Sog‘liqni saqlash mutaxassislari haqiqiy kasallanish va o‘lim holatlari rasmiy statistikadan ham yuqori bo‘lishi mumkinligini istisno qilmayapti. Ayrim chekka hududlarda tibbiy xizmatlarning cheklangani va xavfsizlik muammolari sabab barcha holatlarni o‘z vaqtida qayd etish imkoni bo‘lmayapti.
