O‘zbekistonda 6 oyda qariyb 25 mingta nikoh bekor qilindi
Mamlakatda yarim yilda 92 mingdan ortiq nikoh tuzilgan.
2026-yilning yanvar–iyun oylarida O‘zbekistonda 92,3 mingta nikoh va 24,8 mingta nikohdan ajralish holati qayd etildi. Bu haqda Milliy statistika qo‘mitasi ma’lum qildi.
Qayd etilishicha, 2026-yil 1-iyul holatiga O‘zbekistonning doimiy aholisi soni joriy hisob-kitoblarga ko‘ra 38 million 519,5 ming nafarni tashkil etgan.
Shundan 19 million 400,6 ming nafari erkaklar, 19 million 118,9 ming nafari ayollar hissasiga to‘g‘ri keladi. Aholining 19 million 608,9 ming nafari shaharlarda, 18 million 910,6 ming nafari esa qishloq hududlarida istiqomat qilmoqda.
Statistik ma’lumotlarga ko‘ra, 2026-yilning dastlabki olti oyida respublika bo‘yicha 92,3 mingta nikoh qayd etilgan, 24,8 mingta nikohdan ajralish holati esa davlat ro‘yxatidan o‘tkazilgan.
Tashqi migratsiya ko‘rsatkichlariga ko‘ra, hisobot davrida 1 ming 649 kishi O‘zbekistonga ko‘chib kelgan, 5 ming 422 kishi esa chet davlatlarga ko‘chib ketgan.
Milliy statistika qo‘mitasi ta’kidlashicha, aholini ro‘yxatga olishning yakuniy natijalari e’lon qilingach, mamlakatning doimiy aholisi soni aynan ushbu ma’lumotlar asosida rasman tasdiqlanadi.
