Rossiya mehnat migrantlari uchun yangi talablarni joriy etdi
Yangi qonunga ko‘ra, migrantlar o‘zlari va qaramog‘idagi oila a’zolarini yashash minimumidan kam bo‘lmagan daromad bilan ta’minlashi shart bo‘ladi.
Rossiya Prezidenti Vladimir Putin mehnat migrantlari uchun qo‘shimcha talablarni nazarda tutuvchi qonunni imzoladi.
Hujjatga muvofiq, Rossiyada ishlayotgan xorijiy fuqarolar o‘zlari hamda mamlakatda yashayotgan qaramog‘idagi oila a’zolarini mintaqaviy koeffitsient hisobga olingan yashash minimumidan kam bo‘lmagan daromad bilan ta’minlashi shart bo‘ladi.
Agar ushbu talab bajarilmasa, migrantning patenti yoki ishlash ruxsatnomasi uzaytirilmaydi. Bunday holatda ular, jumladan, voyaga yetmagan farzandlari bilan 15 kun ichida Rossiyani tark etishi talab etiladi.
Qonunga ko‘ra, migrantlarning daromadlari soliq organlari tomonidan nazorat qilinadi. Soliq xizmati ularning daromadlari haqidagi ma’lumotlarni har chorak yakunlari bo‘yicha Rossiya Ichki ishlar vazirligiga avtomatik ravishda taqdim etadi. Shuningdek, migrantlarning o‘zi ham har yili daromadini tasdiqlovchi hujjatlarni taqdim etishi lozim bo‘ladi.
Yangi tartib vaqtinchalik yashash va doimiy yashash ruxsatnomalarini bekor qilish asoslarini ham kengaytiradi. Daromad to‘g‘risidagi ma’lumot taqdim etilmasa yoki jon boshiga to‘g‘ri keladigan daromad belgilangan minimumdan past bo‘lsa, migrantning Rossiyada qolish muddati qisqartirilishi mumkin.
Bundan tashqari, qonunga ko‘ra, migrantlarning farzandlari Rossiyada faqat ota-onasining ishlash ruxsatnomasi amal qilgan davrda yashashi mumkin. 18 yoshga to‘lgan migrant farzandlari esa 30 kun ichida mamlakatni tark etishi yoki patent olish uchun murojaat qilishi shart.
Mazkur qonun 2027-yil 1-yanvardan kuchga kiradi. Ayrim normalar, jumladan, migrantlar daromadi haqidagi ma’lumotlarni Ichki ishlar vazirligiga elektron tarzda taqdim etish tartibi esa 2026-yil 1-oktabrdan amal qila boshlaydi.
