Soliq qo‘mitasi raisining birinchi o‘rinbosari 8 yilga qamaldi
U o‘zlashtirish, mansab vakolatini suiiste’mol qilish va hokimiyat harakatsizligida aybdor deb topilgan.
Jinoyat ishlari bo‘yicha Shayxontohur tuman sudida sobiq Soliq qo‘mitasi raisining birinchi o‘rinbosari M. Mirzayev va yana 8 nafar shaxsga oid jinoyat ishi yuzasidan hukm e’lon qilindi.
Sud hukmiga ko‘ra, sobiq Soliq qo‘mitasi raisining birinchi o‘rinbosari M. Mirzayev Jinoyat kodeksining 168-moddasi 4-qismi “a” bandi (juda ko‘p miqdordagi mulkni o‘zlashtirish yoki rastrata qilish), 205-moddasi 2-qismi “a” bandi (mansab vakolatini juda ko‘p miqdorda zarar yetkazgan holda suiiste’mol qilish) hamda 208-moddasi (hokimiyat harakatsizligi) bilan aybdor deb topildi.
Unga 3 yil muayyan huquqdan mahrum qilish hamda 8 yil 2 oy muddatga ozodlikdan mahrum etish jazosi tayinlandi.
Mazkur jinoyat ishi bo‘yicha sudlangan yana 8 nafar shaxs shaxsga doir ma’lumotlar to‘g‘risidagi qonunchilikni buzish, soliqlarni to‘lashdan bo‘yin tovlash, savdo va xizmat ko‘rsatish qoidalarini buzish, hujjatlarni qalbakilashtirish hamda boshqa jinoyatlarni sodir etganlikda aybdor deb topildi. Ularga 4 yildan 9 yilgacha ozodlikdan mahrum qilish jazolari tayinlandi.
Shuningdek, sud hukmi bilan jinoyat oqibatida yetkazilgan zararlarni undirish belgilandi.
Qayd etilishicha, tayinlangan jazolar sudlanuvchilarga nisbatan qamoqqa olish ehtiyot chorasi qo‘llangan kundan boshlab hisoblanadi.
