Surxondaryoda bog‘cha mudirasi 14 mln so‘m pora bilan ushlandi
U oziq-ovqat mahsulotlari qabul qilinganini tasdiqlovchi hujjatlarga imzo qo‘yish evaziga tadbirkordan pul talab qilgan.
Surxondaryo viloyatining Jarqo‘rg‘on tumanida davlat maktabgacha ta’lim tashkiloti rahbari 14 million so‘m pora olayotgan vaqtida qo‘lga olindi.
Surxondaryo viloyati IIB axborot xizmatining ma’lum qilishicha, bog‘cha mudirasi o‘zi rahbarlik qilayotgan hamda yana bir maktabgacha ta’lim tashkilotiga shartnoma asosida yetkazib berilgan oziq-ovqat mahsulotlari to‘liq qabul qilinganini tasdiqlovchi 10 kunlik hisobotlarga imzo va muhr qo‘yib berish evaziga tadbirkordan pul talab qilgan.
Dastlabki ma’lumotlarga ko‘ra, u har bir bog‘cha uchun 7 million so‘mdan, jami 14 million so‘m so‘ragan.
Joriy yilning 20-iyul kuni Ichki ishlar organlari hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbir davomida gumonlanuvchi talab qilingan pul mablag‘larini olayotgan vaqtida ashyoviy dalillar bilan ushlangan.
Mazkur holat yuzasidan gumonlanuvchi va boshqa shaxslarga nisbatan Jinoyat kodeksining 210-moddasi 2-qismi ("pora olish") bilan jinoyat ishi qo‘zg‘atilgan. Hozirda tergov harakatlari davom ettirilmoqda.
