Tibbiyot xodimlari farzandlari kontraktining 30 foizigacha subsidiya ajratiladi
Kamida 15 yil ishlagan tibbiyot va farmatsevtika xodimlari ushbu subsidiyadan foydalanishi mumkin.
O‘zbekistonda tibbiyot va farmatsevtika xodimlari farzandlarining oliy ta’lim muassasalaridagi kontrakt to‘lovini qisman qoplash uchun subsidiya ajratish tizimi joriy etildi.
Yangi tartibga ko‘ra, davlat tibbiyot muassasalarida kamida 15 yillik mehnat stajiga ega bo‘lgan tibbiyot va farmatsevtika xodimlari mazkur subsidiyadan foydalanish huquqiga ega.
Subsidiya miqdori talabaning yillik kontrakt qiymatining 30 foizini tashkil etadi. Bunda ajratiladigan mablag‘ BHMning 15 baravaridan (6 million 180 ming so‘m) oshmaydi.
Mazkur subsidiya O‘zbekiston hududidagi davlat va nodavlat oliy ta’lim muassasalarida tahsil olayotgan talabalarning kontrakt to‘lovini qisman qoplash uchun ajratiladi.
Subsidiyadan foydalanish istagida bo‘lgan fuqarolar arizalarni subsidiya.imv.uz portali orqali elektron shaklda topshirishlari mumkin.
