Ukrainada urush qurbonlari soni keskin oshdi
BMT ma’lumotlariga ko‘ra, 2026-yilning dastlabki olti oyida tinch aholi orasidagi qurbonlar soni o‘tgan yilning shu davriga nisbatan 37 foizga oshgan.
Ukrainada urush boshlanganidan buyon tinch aholi orasidagi talafotlar eng yuqori darajaga chiqmoqda. BMTning Inson huquqlari bo‘yicha monitoring missiyasi 2026-yilning yanvar–iyun oylarida 1 396 nafar tinch aholi halok bo‘lgani, 7 978 kishi yaralanganini qayd etgan. Bu ko‘rsatkich o‘tgan yilning mos davriga nisbatan 37 foizga yuqori.
Hisobotda aytilishicha, qurbonlar sonining keskin oshishiga Rossiya tomonidan dronlar, raketalar va boshqariladigan aviabombalardan keng foydalanilayotgani sabab bo‘lgan. Ayniqsa, front chizig‘i yaqinidagi hududlarda qisqa masofali dron hujumlari tinch aholi uchun eng katta xavfga aylangan.
BMT ma’lumotlariga ko‘ra, 2026-yilning birinchi yarmida qisqa masofali dronlar oqibatida 418 kishi halok bo‘lgan, 2 437 kishi jarohat olgan. Bu ko‘rsatkich 2025-yilning shu davriga nisbatan deyarli ikki baravar oshgan.
BMT Inson huquqlari bo‘yicha monitoring missiyasi rahbari Danielle Bellning ta’kidlashicha, uzluksiz hujumlar nafaqat odamlar hayotiga zomin bo‘lmoqda, balki elektr, suv, tibbiyot va boshqa muhim infratuzilmalarga ham jiddiy zarar yetkazmoqda. Natijada millionlab ukrainaliklarning kundalik hayoti yanada og‘irlashmoqda.
