AQSh harbiylari Trampni raketa zaxiralari kamaygani haqida ogohlantirdi — AP
Strategik o‘q-dorilar zaxirasining kamayishi AQShning harbiy imkoniyatlariga ta’sir qilishi mumkin.
AQSh Qurolli kuchlari rahbariyati prezident Donald Trampni strategik raketa va o‘q-dorilar zaxiralari holati bo‘yicha yopiq brifingda xabardor qildi.
Associated Press agentligi manbalariga ko‘ra, AQSh Qurolli Kuchlari shtab boshliqlari qo‘mitasi raisi Den Keyn prezident Donald Trampga mavjud raketa zaxiralari Vashingtonning Eronga nisbatan ehtimoliy harbiy harakatlarini kengaytirish imkoniyatini cheklashi mumkinligi haqida ma’lumot bergan.
Xabarda aytilishicha, raketa va boshqa o‘q-dorilar zaxirasiga oid hisobot prezidentga Eronga qarshi ehtimoliy harbiy operatsiyalar bo‘yicha turli ssenariylar bilan birgalikda taqdim etilgan.
AP ma’lumotiga ko‘ra, harbiy mutaxassislar mavjud zaxiralar keyingi ehtimoliy operatsiyalarni rejalashtirishda muhim omil bo‘lib qolayotganini ta’kidlagan.
Avvalroq The New York Times gazetasi Donald Tramp Eronga qarshi harbiy harakatlarni kengaytirishni raketa zaxiralari, jumladan havo mudofaasi tizimlari uchun mo‘ljallangan raketalar yetishmasligi sababli ortga surganini yozgan edi. Biroq Tramp keyinchalik bu ma’lumotlarni rad etgan.
