“Chinor” metro bekati 29-iyuldan faoliyatini qayta boshlaydi
Rekonstruksiyadan so‘ng bekatdagi kunlik xizmat ko‘rsatish quvvati 40 ming nafargacha oshirildi.
Toshkent metropolitenining rekonstruksiya qilingan “Chinor” metro bekati 29-iyuldan yana yo‘lovchilarga xizmat ko‘rsatishni boshlaydi.
Toshkent metropoliteni ma’lum qilishicha, “Chinor” metro bekatida olib borilgan rekonstruksiya va kengaytirish ishlari yakunlangan. Shu munosabat bilan bekat 29-iyul kuni soat 05:00 dan boshlab yo‘lovchilar uchun to‘liq faoliyatini qayta boshlaydi.
Qayd etilishicha, rekonstruksiya ishlari O‘zbekiston Respublikasi Vazirlar Mahkamasining 2026-yil 30-apreldagi yig‘ilishi bayonnomasi asosida belgilangan topshiriqlar ijrosi doirasida amalga oshirilgan.
Yangilash jarayonida bekatning kirish va chiqish hududlari sezilarli darajada kengaytirilgan. Turniketlar soni 6 tadan 13 taga yetkazilgan, yo‘lovchilar harakatiga qulaylik yaratish maqsadida o‘tish yo‘laklari qayta loyihalashtirildi hamda bekatdan bekatga to‘g‘ridan to‘g‘ri o‘tish imkoniyati yaratilgan.
Shuningdek, rekonstruksiya natijasida bekatning xizmat ko‘rsatish quvvati sezilarli darajada oshgan. Avval kuniga o‘rtacha 15 ming nafar yo‘lovchiga xizmat ko‘rsatgan bekat endilikda 35–40 ming nafargacha yo‘lovchini qabul qilish imkoniyatiga ega bo‘ldi.
