Isroil Suriyaning janubida tahdidli varaqalar tarqatdi
Varaqalarda Isroil armiyasiga qarshi har qanday harakatni to‘xtatish talabi ilgari surilgan.
Isroil armiyasi Suriyaning janubidagi Dara va Qunaytra viloyatlari oralig‘ida joylashgan Yarmuk daryosi hududiga havodan tahdid mazmunidagi varaqalar tarqatdi.
Mahalliy manbalarga ko‘ra, bu voqea mahalliy aholi Isroil qo‘shinlarining Suriya hududiga kirishiga to‘sqinlik qilish maqsadida ayrim yo‘llarni toshlar bilan to‘sib qo‘yganidan keyin sodir bo‘lgan.
Tarqatilgan varaqalarda Isroil armiyasiga qarshi har qanday harakatni, jumladan yo‘llarni to‘sishni zudlik bilan to‘xtatish talabi ilgari surilgan. Shuningdek, Isroil harbiylari mintaqadagi operatsiyalarini “mavjud barcha vositalardan foydalangan holda” davom ettirishi haqida ogohlantirilgan.
Ma’lum qilinishicha, Isroil armiyasi so‘nggi vaqtlarda Dara va Qunaytra hududlarida muntazam reydlar o‘tkazib, tintuvlar amalga oshirmoqda, nazorat punktlarini tashkil etmoqda hamda ayrim fuqarolarni hibsga olmoqda.
Bunga javoban mahalliy aholi Isroil qo‘shinlariga murojaat yo‘llab, o‘z hududlarini himoya qilishda davom etishini bildirgan.
Manbalarga ko‘ra, Bashar Asad hokimiyati ag‘darilganidan so‘ng Isroil 1974-yildagi Kuchlarni ajratish to‘g‘risidagi bitimdan chetga chiqib, Dara va Qunaytra hududlarida harbiy postlar tashkil etgan. Shu davrdan buyon mazkur hududlarda 50 nafardan ortiq shaxs hibsga olingan.
