Janubiy Koreyaning sobiq prezidenti yana 18 oylik qamoq jazosiga hukm qilindi
Umrbod qamoq jazosini o‘tayotgan Yun Sok Yol saylov qonunchiligini buzganlik bo‘yicha ham aybdor deb topildi.
Janubiy Koreya sudi sobiq prezident Yun Sok Yolni saylov qonunchiligini buzganlikda aybdor deb topib, unga qo‘shimcha 18 oylik qamoq jazosi tayinladi.
Reuters xabariga ko‘ra, tergov organlari Yun Sok Yolni 2022-yilgi prezidentlik saylovlari kampaniyasi davomida yolg‘on ma’lumot berganlikda ayblagan. Sud uni aybdor deb topib, qo‘shimcha ravishda bir yarim yil muddatga ozodlikdan mahrum qilgan.
Ma’lum qilinishicha, agar ushbu hukm apellyatsiya instansiyasida ham o‘z kuchida qolsa, Yun Sok mansub bo‘lgan Xalq hokimiyati partiyasi Milliy saylov komissiyasidan saylov kampaniyasi uchun olingan 39,7 milliard von (taxminan 27,1 million AQSh dollari) miqdoridagi mablag‘ni qaytarishi mumkin.
Sobiq prezident ayni paytda 2025-yilda davlat to‘ntarishiga urinish bilan bog‘liq ish bo‘yicha tayinlangan umrbod qamoq jazosini o‘tamoqda. Unga nisbatan jami kamida sakkizta jinoyat ishi qo‘zg‘atilgan.
Shuningdek, iyul oyi o‘rtalarida Yun Sok Yol saylovlarni moliyalashtirish to‘g‘risidagi qonunchilikni buzganlik bo‘yicha ham qo‘shimcha ikki yillik qamoq jazosiga hukm qilingan edi. Uning rafiqasi, sobiq birinchi xonim Kim Kon Xi esa poraxo‘rlik va korrupsiya bilan bog‘liq bir nechta ayblovlar yuzasidan sudlanmoqda.
