Jarima ballarini pul evaziga o‘chirishning imkoni yo‘q — IIV
IIV Yo‘l harakati xavfsizligi xizmati ijtimoiy tarmoqlarda haydovchilarning jarima ballarini o‘chirib berishni va’da qilayotgan firibgarlardan ogoh bo'lishga chaqirdi.
Ijtimoiy tarmoqlarda ma’lum miqdordagi pul evaziga haydovchilarning jarima ballarini bazadan o‘chirib tashlashni va’da qilayotgan firibgarlar paydo bo‘ldi. Bu haqda IIV Jamoat xavfsizligi departamenti Yo‘l harakati xavfsizligi xizmati matbuot kotibi Zoyir Yo‘ldoshev ma’lum qildi.
Uning ta’kidlashicha, jarima ballarini pul evaziga o‘chirishning texnik imkoniyati mavjud emas.
“Bu firibgarlikdan boshqa narsa emas. Jarima ballarini o‘chirishning texnik imkoniyatlari mavjud emas. Bu onlayn tarzda hisoblanadigan, to‘liq himoyalangan tizim. Shu bois fuqarolarimiz bunday firibgarlarning yolg‘on va’dalariga ishonib qolmasliklari kerak. Agar shunday holatga duch kelishsa, zudlik bilan ichki ishlar organlariga murojaat qilishlarini so‘raymiz”, — dedi Zoyir Yo‘ldoshev.
Ma’lum qilinishicha, mutaxassislar Instagram orqali reklama qilingan xizmatga oid Telegram-kanalni o‘rganish jarayonida unda xizmatdan foydalangan mijozlar mavjuddek taassurot uyg‘otish maqsadida soxta yozishmalar joylashtirilganini aniqlagan.
Eslatib o‘tamiz, 2026-yil 1-apreldan boshlab avtomatik foto va video qayd etish vositalari orqali aniqlanadigan ayrim yo‘l harakati qoidabuzarliklari uchun jarima bilan bir qatorda jarima ballari ham hisoblanmoqda. Bular qarama-qarshi harakatlanish bo‘lagiga chiqish, to‘xtash va to‘xtab turish qoidalarini buzish, svetoforning taqiqlovchi ishorasiga bo‘ysunmaslik hamda belgilangan tezlikni oshirish holatlaridir.
Hozirga qadar 700 nafardan ortiq haydovchi 12 balldan ortiq jarima ballari to‘plagani sababli ularni transport vositasini boshqarish huquqidan mahrum etish bo‘yicha qonunchilikda belgilangan choralar ko‘rilmoqda.
