O‘zbekistonda harbiy forma ko‘rinishidagi kiyimlarni kiyganlik uchun jarima joriy etiladi

 

Oliy Majlis Qonunchilik palatasi davlat organlari xodimlarining harbiy va idoraviy formali kiyim-boshidan noqonuniy foydalanish holatlarining oldini olishga qaratilgan qonun loyihasini birinchi o‘qishda qabul qildi.

 

Qayd etilishicha, davlat organlari, vazirlik va idoralar xodimlari uchun belgilangan formali kiyim-bosh ularning xizmat vakolatini ifodalovchi muhim ramz hisoblanadi. Bunday kiyim fuqarolarda ishonch uyg‘otishi, shuningdek, uni kiyib yurgan shaxsga qonun bilan belgilangan vakolat va mas’uliyat yuklanganini anglatadi.

 

So‘nggi yillarda ayrim tashkilotlar hamda fuqarolar tomonidan tasdiqlangan harbiy yoki idoraviy formaga adashtirib yuborish darajasida o‘xshash kiyimlardan foydalanish holatlari kuzatilayotgani qayd etildi. Bu esa fuqarolarni chalg‘itishi, davlat organlari nufuziga salbiy ta’sir ko‘rsatishi hamda ayrim shaxslarning o‘zini davlat xizmatchisi sifatida ko‘rsatib, fuqarolar ishonchini suiiste’mol qilishiga sharoit yaratishi mumkinligi ta’kidlandi.

 

Shu munosabat bilan Ma’muriy javobgarlik to‘g‘risidagi kodeksga davlat organlarining tasdiqlangan harbiy yoki idoraviy formali kiyim-boshiga adashtirib yuborish darajasida o‘xshash, shuningdek, unga xos farqlovchi belgilar yoki ramzlarga ega kiyimlarni joriy etganlik yoki ulardan foydalanganlik uchun ma’muriy javobgarlik belgilash taklif etilmoqda.

 

Deputatlar muhokamalar davomida qonun loyihasi yuzasidan o‘z fikr va takliflarini bildirib, ayrim normalarni yanada takomillashtirish zarurligini qayd etdi. Yakunda hujjat birinchi o‘qishda qabul qilindi.