Rossiya va Shimoliy Koreya yangi strategik yo‘lakni yakunlamoqda
Ayrim tahlilchilar ko‘prik harbiy yuklarni tashish uchun muhim yo‘lakka aylanishi mumkinligini bildirmoqda.
Rossiya va Shimoliy Koreya Tuman daryosi ustidan o‘tuvchi tarixdagi ilk avtomobil ko‘prigi qurilishini yakunlash arafasida. Ko‘prik Rossiyaning Xasan shaharchasi bilan Shimoliy Koreyaning Tumangan hududini bog‘laydi. Bu haqda The Guardian xabar berdi.
Loyiha 2024-yilda Rossiya prezidenti Vladimir Putin va Shimoliy Koreya yetakchisi Kim Chen In imzolagan strategik hamkorlik shartnomasidan so‘ng boshlangan. Uzunligi qariyb 1 kilometr, eni esa 7 metr bo‘lgan ikki polosali ko‘prik deyarli bitgan. Biroq Rossiya tomonidagi bojxona va chegara infratuzilmasi hali to‘liq tayyor emasligi sababli uning ochilishi kechikmoqda.
Moskva va Pxenyan loyiha ikki davlat o‘rtasidagi savdo, logistika va turizmni rivojlantirishini bildirmoqda. Ammo Britaniyaning The Guardian nashri e'lon qilgan va ukrainalik Truth Hounds tashkiloti tayyorlagan tadqiqotga ko‘ra, ko‘prikning asl ahamiyati harbiy logistika bilan bog‘liq bo‘lishi mumkin. Tahlilchilarning fikricha, avtomobil transporti orqali yuklarni tashish temiryo‘lga qaraganda sun’iy yo‘ldosh kuzatuvidan yashirish osonroq.
Hisobotda qayd etilishicha, ko‘prik Shimoliy Koreya harbiylari, qurilish brigadalari va rasmiylarini Rossiyaga tezroq olib o‘tish, shuningdek, Rossiyadan texnologiyalar va boshqa yuklarni Shimoliy Koreyaga yetkazishni osonlashtirishi mumkin. Tahlilchilarga ko‘ra, bu Rossiya va Shimoliy Koreya o‘rtasidagi harbiy hamkorlikni yanada mustahkamlashga xizmat qiladi.
