Shveysariya sudi Gulnora Karimovaga oid ishni to‘xtatdi

 

Shveytsariya Federal Jinoyat sudi Gulnora Karimova ishi doirasida Jenevada joylashgan Lombard Odier xususiy bankini pul yuvishning oldini olish bo‘yicha yetarli choralar ko‘rmaganlik uchun 3 million Shveytsariya franki miqdorida jarimaga tortdi.

 

Sud qaroriga ko‘ra, bankning sobiq xodimi og‘ir pul yuvish jinoyatida aybdor deb topilib, unga 2 yillik shartli qamoq jazosi tayinlandi.

 

Shu bilan birga, Gulnora Karimovaga nisbatan olib borilgan jinoyat ishi protsessual sabablarga ko‘ra to‘xtatildi. Sud uning aybdorligi yoki aybsizligi yuzasidan huquqiy baho bermagan hamda ayblovlarning mazmunini ko‘rib chiqmagan. Shu sababli ushbu qaror oqlov hukmi hisoblanmaydi.

 

Sud materiallariga ko‘ra, Lombard Odier banki "Ofis" deb atalgan va tergov tomonidan jinoiy tuzilma sifatida baholangan tizim bilan bog‘liq hisobvaraqlar yuzasidan pul mablag‘larining kelib chiqishini yetarli darajada tekshirmagan. Tergov versiyasiga ko‘ra, mazkur mablag‘lar O‘zbekistondagi telekommunikatsiya loyihalari bilan bog‘liq korrupsion to‘lovlar orqali shakllangan.

 

Birinchi instansiya sudi, shuningdek, 400 million Shveytsariya frankidan ortiq aktivlarni musodara qilish haqida qaror chiqardi. Ushbu mablag‘larning yakuniy taqdiri hukm qonuniy kuchga kirishi va ehtimoliy apellyatsiya natijalariga bog‘liq bo‘ladi.

 

Lombard Odier banki sud qarori ustidan shikoyat qilishini ma’lum qilib, o‘sha davrda pul yuvishga qarshi zarur ichki nazorat mexanizmlari amalda bo‘lganini ta’kidlagan.

 

Eslatib o‘tamiz, Shveytsariya va O‘zbekiston o‘rtasida avval Gulnora Karimova bilan bog‘liq musodara qilingan aktivlarning bir qismini BMTning maxsus ishonch jamg‘armasi orqali O‘zbekistonga qaytarish bo‘yicha kelishuvlar imzolangan. Mazkur mablag‘lar ta’lim, sog‘liqni saqlash hamda ijtimoiy loyihalarni moliyalashtirishga yo‘naltirilishi belgilangan.