Sobiq IIV o‘rinbosari Bekmurod Abdullayev ishi sudga oshirildi

 

Ichki ishlar vazirining sobiq o‘rinbosari Bekmurod Abdullayev va yana 30 kishiga oid jinoyat ishi sudga oshirildi.

 

Sud ishlari jadvaliga ko‘ra, mazkur ish Jinoyat ishlari bo‘yicha Yangihayot tuman sudida ko‘rib chiqiladi. Dastlabki sud majlisi 29-iyul kuniga belgilangan.

 

Bekmurod Abdullayev Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish)ning bir qator qism va bandlari bo‘yicha ayblanmoqda. Ish doirasida yana 30 nafar sudlanuvchi javobgarlikka tortilgan bo‘lib, ularning aksariyati ham mazkur moddaning tegishli bandlari bilan ayblanmoqda.

 

Sudlanuvchilar orasida Jazoni ijro etish departamentining sobiq boshlig‘i Rustam Tursunov ham bor. U o‘zlashtirish yoki rastrata yo‘li bilan talon-toroj qilish, shuningdek, mansab vakolatini suiiste’mol qilish bilan bog‘liq moddalar bo‘yicha ayblanmoqda.

 

Ma’lumot uchun, general-mayor Bekmurod Abdullayev 2021-yil aprelidan Ichki ishlar vaziri o‘rinbosari – Jamoat xavfsizligi departamenti boshlig‘i lavozimida faoliyat yuritgan. U 2025-yil noyabr oyida lavozimidan ozod etilgan, 2026-yil yanvarida esa davlat mulkini yirik miqdorda talon-toroj qilishda gumonlanib qamoqqa olingan edi.

 

Avvalroq Prezident raisligidagi yig‘ilishda Ichki ishlar vazirligi tizimidagi davlat xaridlari orqali 186 milliard so‘m byudjet mablag‘i o‘zlashtirilgani ma’lum qilingan edi.