Sobiq isroillik harbiylar Trampni Netanyaxuga bosim o‘tkazishga chaqirdi

 
Isroilning iste'fodagi harbiy va xavfsizlik sohasi vakillarini birlashtirgan Commanders for Israel's Security tashkiloti AQSH prezidenti Donald Trampga ochiq maktub yo‘lladi. Uni 550 nafardan ortiq sobiq general, Mossad, Shin Bet, politsiya va diplomatik korpusning sobiq yuqori lavozimli amaldorlari imzolagan. Bu haqda Al Jazeera xabar berdi.

 
Murojaatda G‘arbiy sohilda yahudiy ko‘chmanchilar tomonidan sodir etilayotgan zo‘ravonliklar "ko‘chmanchilar terrori" deb atalgan. Mualliflarning ta'kidlashicha, vaziyat nazorat ostiga olinmasa, bu Isroil xavfsizligi va AQSHning mintaqadagi manfaatlariga jiddiy putur yetkazishi, hattoki 2023-yil 7-oktabr voqealaridan ham og‘irroq oqibatlarga olib kelishi mumkin.

 
Sobiq harbiylar Trampdan Vashingtonda bo‘lib o‘tadigan uchrashuv chog‘ida Isroil bosh vaziri Binyamin Netanyaxuni ko‘chmanchilar zo‘ravonligini to‘xtatish, qonun ustuvorligini tiklash va aybdorlarni javobgarlikka tortishga undashni so‘ragan. Ularning fikricha, bunday hujumlar Isroilning xalqaro obro‘siga putur yetkazmoqda hamda Falastin bilan mojaroni yanada chuqurlashtirmoqda.

 
Ma’lumot uchun, Netanyaxu ayni kunlarda AQSHda bo‘lib, Donald Tramp bilan uchrashuv o‘tkazishi rejalashtirilgan. Muzokaralarda Eron bilan bog‘liq vaziyat asosiy mavzu bo‘lishi kutilayotgan bo‘lsa-da, G‘arbiy sohildagi keskinlashayotgan vaziyat ham kun tartibidan o‘rin olishi mumkin.