Tojikistonda hijob, soqol va arabcha kiyimlarga cheklov kuchaytirildi
Mahalliy hokimiyat ayollarni an’anaviy tojik milliy liboslarini kiyishga chaqirmoqda.
Mahalliy OAV ma’lumotlariga ko‘ra, Tojikiston hukumati mamlakat milliy an’analariga zid deb baholangan kiyim-kechak va tashqi ko‘rinish elementlariga nisbatan cheklovlarni amalga oshirishni davom ettirmoqda.
Xabarlarga ko‘ra, "tojik madaniyatiga begona" deb e’tirof etilgan kiyimlarni kiyish va mamlakatga olib kirishga alohida e’tibor qaratilmoqda. Cheklovlar, asosan, ayrim turdagi hijoblar hamda arab uslubidagi kiyimlarga taalluqli ekani qayd etilgan.
Shuningdek, mahalliy hokimiyat organlari aholi o‘rtasida tushuntirish ishlarini olib borib, ayollarni an’anaviy tojik milliy liboslarini tanlashga chaqirmoqda.
Bundan tashqari, huquqni muhofaza qiluvchi organlar diniy ekstremizm bilan bog‘liq deb baholanadigan soqol qo‘ygan erkaklar ustidan nazoratni kuchaytirgani aytilmoqda.
Tojikiston rasmiylari ushbu choralarni diniy radikalizm va ekstremizmning oldini olish, shuningdek, milliy qadriyatlarni asrashga qaratilgan siyosatning bir qismi sifatida izohlamoqda.
