Toshkentda spa-salon niqobi ostida odam savdosi bilan shug‘ullangan jinoiy guruh fosh etildi
Guruh qizlarni ish va’dasi bilan jalb qilib, ularni zo‘ravonlik va tahdid orqali jinsiy ekspluatatsiyaga majburlagan.
Toshkent shahrining Mirobod tumanida spa-salon niqobi ostida odam savdosi va jinsiy ekspluatatsiya bilan shug‘ullangan jinoiy guruh faoliyatiga chek qo‘yildi.
Toshkent shahar Ichki ishlar bosh boshqarmasining ma'lum qilishicha, gumonlanuvchilar turli ish va’dalari bilan ikki nafar qizni jalb qilib, ularni erkiga zid ravishda salonda ushlab turgan hamda tahdid va zo‘ravonlik orqali mijozlarga intim xizmat ko‘rsatishga majburlagan. Shu yo‘l bilan ular noqonuniy daromad orttirgani aniqlangan.
Jabrlanuvchilarning ko‘rsatmalariga ko‘ra, ularga nisbatan jismoniy va ruhiy bosim o‘tkazilgan, qarshilik ko‘rsatgan hollarda kaltaklangan, tahdid qilingan hamda muassasani tark etishlariga yo‘l qo‘yilmagan.
Tezkor tadbir davomida yana yetti nafar ayolning ham massaj xizmati niqobi ostida fohishalik bilan shug‘ullanib kelgani aniqlangan. Gumonlanuvchilar intim xizmat ko‘rsatish evaziga 320 AQSH dollari va 6 million 250 ming so‘m olayotgan vaqtida ashyoviy dalillar bilan qo‘lga olingan. Hodisa joyidan olingan daliliy ashyolar belgilangan tartibda rasmiylashtirilgan.
Mazkur holat yuzasidan gumonlanuvchilarga nisbatan O‘zbekiston Respublikasi Jinoyat kodeksining 135-moddasi 2-qismi (odam savdosi) bilan jinoyat ishi qo‘zg‘atilgan. Hozirda tergov harakatlari davom ettirilmoqda. Huquqni muhofaza qiluvchi organlar bunday turdagi jinoyatlarga qarshi tezkor tadbirlar izchil davom ettirilishini ma’lum qildi.
