AQSh va Saudiya Arabistoni Iroqdagi obyektga zarba berdi

 

AQSh va Saudiya Arabistoni Iroqning Nineviya viloyatida Eron tomonidan qo‘llab-quvvatlanayotgan qurolli guruhlar pozitsiyalariga nishonli havo zarbalari berganini ma’lum qildi.

 

AQSh Markaziy qo‘mondonligi (CENTCOM) ma’lumotiga ko‘ra, operatsiya AQSh harbiylari hamda Saudiya Arabistonining energetika infratuzilmasiga tahdid solayotgan nishonlarga qarshi amalga oshirilgan. Vashington ushbu amaliyot Eron tomonidan Yaqin Sharqdagi AQSh obyektlariga uchirilgan ballistik raketalarni tutib qolish bilan bog‘liq emasligini ta’kidlagan.

 

AQSh harbiylari bayonotida zarbalar Islom inqilobi qo‘riqchilari korpusi (IRGC) tomonidan qo‘llab-quvvatlanayotgan qurolli guruhlarga qaratilgani qayd etilgan. Shuningdek, qo‘mondonlik mintaqadagi vaziyat yuzasidan yuqori jangovar shaylik saqlanayotganini ma’lum qilgan.

 

Vashington Tehronni AQSh harbiylari yoki Saudiya Arabistonining energetika infratuzilmasiga qarshi yangi hujumlar amalga oshirilgan taqdirda qo‘shimcha choralar ko‘rilishi mumkinligidan ogohlantirgan.

 

Saudiya Arabistoni Mudofaa vazirligi ham operatsiyani tasdiqlab, mamlakat keskinlikni kuchaytirish niyatida emasligini, biroq har qanday tajovuzga qat’iy javob qaytarishini bildirgan.

 

Ayni paytda Iroq hukumati mamlakat hududidan qo‘shni yoki hamkor davlatlarga qarshi hujumlar uchun foydalanilishiga yo‘l qo‘ymasligini ma’lum qilgan. Iroqdagi Eron tarafdori qurolli guruhlar esa mazkur hujumlarga aloqadorligini rad etib, Saudiya Arabistoni tomonidan ilgari surilgan da’volarni asossiz deb atadi.