Buxoro va Qashqadaryoda yer uchastkalarini rasmiylashtirish evaziga pora olgan mansabdorlar ushlandi
Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
Davlat xavfsizlik xizmati ma’lum qilishicha, Buxoro viloyatida Davlat kadastrlari palatasi boshqarmasi bo‘lim boshlig‘i mahalliy fuqaroning 2015-yilda Romitan tumani hokimligi zaxirasidagi 65 kvadrat metr yer maydonida o‘zboshimchalik bilan qurilgan savdo va xizmat ko‘rsatish binosi hamda unga tutash 35 kvadrat metr bo‘sh yer uchastkasini uning nomiga rasmiylashtirib berishni va’da qilgan.
Qayd etilishicha, mansabdor shaxs ushbu xizmat evaziga 2,5 ming AQSH dollari olgan vaqtida Davlat xavfsizlik xizmati, Bosh prokuratura huzuridagi Departament hamda ichki ishlar organlari xodimlari tomonidan ashyoviy dalillar bilan ushlangan.
Shuningdek, Qashqadaryo viloyatida Investitsiyalar, sanoat va savdo boshqarmasining Ko‘kdala tumani bo‘limi bosh mutaxassisi 2019-yilda Chiroqchi tumani hokimi qarori bilan ajratilgan 1 sotix yer maydoni bo‘yicha kadastr hujjatlarini tayyorlab, davlat ro‘yxatidan o‘tkazib berishni va’da qilgan.
U mazkur xizmat uchun 1 ming AQSH dollari talab qilib, pulni olayotgan vaqtida Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan qo‘lga olingan.
Mazkur holatlar yuzasidan gumonlanuvchilarga nisbatan jinoyat ishlari qo‘zg‘atilib, tergov harakatlari olib borilmoqda.
