Kosonda hokim o‘rinbosari fuqaro bilan janjallashgani aytilmoqda
Ijtimoiy tarmoqlarda tarqalgan videolarga rasmiy munosabat bildirildi.
Ijtimoiy tarmoqlarda Koson tumani hokimi o‘rinbosari ekani aytilgan shaxs ishtirokidagi video keng tarqaldi. O‘zbekiston mahallalari uyushmasi mazkur holat yuzasidan rasmiy munosabat bildirib, videoda aks etgan shaxs hokim o‘rinbosari emasligini ma’lum qildi.
Uyushma ma’lumotiga ko‘ra, videoda aks etgan shaxs O‘zbekiston mahallalari uyushmasining Koson tumani bo‘limi boshlig‘i Ubaydulla Ochilov hisoblanadi.
Qayd etilishicha, videoda fuqaroga nisbatan muomala va so‘zlashuv uslubi davlat xizmatchilari odob-axloq me’yorlariga mutlaqo zid bo‘lib, O‘zbekiston mahallalari uyushmasi bunday xatti-harakatlarni qat’iy qoralaydi.
Ma’lum qilinishicha, holat yuzasidan xizmat tekshiruvini o‘tkazish uchun maxsus ishchi guruh tuzilgan. O‘rganish yakunlariga ko‘ra, xodimning xatti-harakatlariga amaldagi qonunchilik doirasida huquqiy baho berilib, tegishli choralar ko‘riladi.
