O‘zbekistonliklar Dubayga ishga taklif qilinmoqda
Tanlovdan o‘tgan nomzodlarga oyiga 2 250 AQSh dollari maosh to‘lanadi, asosiy xarajatlar esa ish beruvchi tomonidan qoplanadi.
O‘zbekiston fuqarolari BAAning Dubay xalqaro aeroportida biznes va birinchi toifa yo‘lovchilari uchun mo‘ljallangan maxsus kutish zallarida xizmat ko‘rsatish sohasida ishlashga taklif qilinmoqda. Vakansiyalar soni 80 ta bo‘lib, nomzodlar bilan 2 yillik mehnat shartnomasi tuziladi. Bu haqda Migratsiya agentligi xabar berdi.
Ish kuniga 8 soatni tashkil etadi. Oylik ish haqi 8 226 BAA dirham (taxminan 2 250 AQSH dollari) etib belgilangan. Mazkur daromaddan soliq ushlab qolinmaydi.
Nomzodlardan 20–30 yosh oralig‘ida bo‘lishi, mehmonxona va restoran xizmati yo‘nalishi bo‘yicha mutaxassislikka ega bo‘lishi, ovqat va ichimliklar xizmati sohasida kamida 1 yillik ish tajribasi hamda ingliz tilini kamida B2 darajada bilishi talab etiladi. IELTS, TOEFL yoki boshqa xalqaro til sertifikatiga ega nomzodlarga ustunlik beriladi.
Ish beruvchi ishchi vizasi, O‘zbekiston–BAA aviachiptasi, aeroportdan ish joyigacha transfer, ish ruxsatnomasi, tibbiy sug‘urta, turar joy, ovqatlanish va ish joyiga transport xarajatlarini to‘liq qoplaydi.
Nomzodlar arizalarni 13-avgustga qadar xorijdaish.uz sayti orqali topshirishi mumkin. Hujjatlar 3–7 kun ichida ko‘rib chiqiladi. Talablarga mos kelgan nomzodlar 20–25-avgust kunlari bo‘lib o‘tadigan onlayn suhbat bosqichiga taklif etiladi.
