O‘zbekistonning tashqi savdo aylanmasi 41 milliard dollardan oshdi
O‘tgan yilning mos davriga nisbatan 7,4 foiz o‘sish qayd etilgan bo‘lsa-da, import hajmining keskin ortishi tashqi savdo balansida 9,2 milliard dollarlik manfiy saldo yuzaga kelishiga olib keldi.
Milliy statistika qo‘mitasi ma’lumotlariga ko‘ra, yanvar–iyun oylarida mamlakatning tashqi savdo aylanmasi 41 mlrd dollarni tashkil etdi. Shundan 15,9 mlrd dollari eksport, 25,1 mlrd dollari import hissasiga to‘g‘ri keldi. O‘tgan yilning mos davriga nisbatan eksport 8,8 foizga kamaygan, import esa 21 foizga oshgan. Natijada tashqi savdo balansida 9,2 milliard dollarlik manfiy saldo qayd etildi.
Shu bilan birga, oltin hisobga olinmagan tovarlar eksporti sezilarli o‘sishni namoyish etdi. Ushbu ko‘rsatkich 8,2 milliard dollarni tashkil etib, o‘tgan yilning mos davriga nisbatan 28,7 foizga oshgan. Bu esa qayta ishlangan sanoat mahsulotlari va boshqa noxomashyo eksporti hajmi ortib borayotganini ko‘rsatadi.
Hisobot davrida O‘zbekiston 195 ta davlat bilan savdo aloqalarini amalga oshirdi. Tashqi savdo aylanmasida eng yirik hamkorlar quyidagilar bo‘ldi:
Xitoy – 23,1%
Rossiya – 17,1%
Qozog‘iston – 6,8%
Turkiya – 3,4%
Afg‘oniston – 2,6%
Eksport tarkibida xizmatlar, to‘qimachilik mahsulotlari, oziq-ovqat, kimyo sanoati mahsulotlari, rangli metallar va mashina-uskunalar muhim ulushni egalladi. Importda esa asosan mashina va transport uskunalari, sanoat mahsulotlari, kimyoviy vositalar hamda mineral yoqilg‘i yetakchi o‘rinni saqlab qoldi.
Statistika qo‘mitasi qayd etishicha, umumiy eksport hajmi pasayganiga qaramay, bu holat asosan oltin eksportidagi o‘zgarishlar bilan bog‘liq. Oltin hisobga olinmagan eksportning qariyb 29 foizga o‘sishi esa mamlakat eksporti tobora diversifikatsiya qilinayotganini ko‘rsatadi.
