Piskentda alimentdan qarzdor ota xontaxta tagidan topildi
Maʼlum bo‘lishicha, erkak alimentni muntazam to‘lamay kelgan, qarzdorlik esa 40 mln so‘mdan ortib ketgan.
Toshkent viloyatining Piskent tumanida aliment to‘lashdan bo‘yin tovlab, yashirinib yurgan ota xontaxta orqasida bekinib o‘tirganda qo‘lga tushdi. Bu haqida MIB axborot xizmati Zamon.uz'ga maʼlum qildi.
Bildirilishicha, Piskent tumanida yashovchi fuqaro turmush o‘rtog‘i bilan oilaviy kelishmovchiliklar sabab ajrashib ketgan va ikkinchi tomon farzandini moddiy taʼminlamay qo‘ygan.
Shundan so‘ng ona o‘z huquqidan foydalangan holda farzandi haqini talab qilib sudga murojaat qilgan. Sud qaroriga ko‘ra, undiruvchi ayol foydasiga 2 nafar farzandlari uchun har oyda aliment undirish tartibi belgilangan.
Sud ijro hujjati Byuroning Piskent tuman bo‘limi ish yurituviga kelib tushgan va ijro harakatlariga kirishilgan. Qarzdorlik 40 million so‘mdan ortib ketgan.
Unga nisbatan davlat ijrochisi tomonidan qidiruv eʼlon qilingan. Boshqarma inspektorlari huquqni muhofaza qilish idoralari xodimlari bilan hamkorlikda topish chorasini olib borgan.
Xodimlar olingan tezkor maʼlumotlarga ko‘ra, yashash xonadonga borganda oila aʼzolari uning kelmaganini bildirgan. Biroq xonadon yashash joylari puxta ko‘zdan kechirilganda, qarzdor (xontaxta) stol orqasidan topilgan.
