Pokistonda kuchli yomg‘irlar oqibatida 100 dan ortiq kishi halok bo‘ldi
Musson yomg‘irlari yuzlab binolarga zarar yetkazib, 200 dan ortiq inshootning butunlay vayron bo‘lishiga sabab bo‘ldi.
Pokistonda 26-iyundan buyon davom etayotgan kuchli musson yomg‘irlari va ular keltirib chiqargan tabiiy ofatlar oqibatida kamida 109 kishi halok bo‘ldi, yana 362 kishi jarohat oldi.
Bu haqda Islom Respublikasi Tabiiy ofatlarni boshqarish milliy boshqarmasi ma’lum qildi.
Ma’lumotlarga ko‘ra, eng ko‘p talafot mamlakatning shimoli-g‘arbidagi Xayber Paxtunxva viloyatida kuzatilgan bo‘lib, u yerda 55 kishi halok bo‘lgan. Panjob viloyatida esa 36 nafar fuqaro tabiiy ofatlar qurboniga aylangan.
Kuchli yog‘ingarchilik va toshqinlar oqibatida mamlakat bo‘ylab 800 ga yaqin bino zarar ko‘rgan, shundan 200 dan ortig‘i butunlay vayron bo‘lgan.
Rasmiy ma’lumotlarga ko‘ra, iyun oyi oxiridan buyon 148 ta qutqaruv amaliyoti o‘tkazilib, qariyb 4 ming kishi xavfsiz hududlarga evakuatsiya qilingan.
Pokistonda musson mavsumi odatda iyun–sentyabr oylariga to‘g‘ri keladi. Ushbu yog‘ingarchiliklar qishloq xo‘jaligi uchun muhim ahamiyatga ega bo‘lsa-da, ko‘pincha kuchli toshqinlar, ko‘chkilar va boshqa tabiiy ofatlarga sabab bo‘ladi.
