Tojikiston hijob va uzun soqol taqiqlangani haqidagi xabarlarga munosabat bildirdi
Ayrim OAVlarda tarqalgan hijob va soqol bo‘yicha ma’lumotlar haqiqatga mos kelmaydi.
Tojikiston rasmiylari mamlakatda hijob va uzun soqolni qonun bilan taqiqlash joriy etilgani haqidagi xabarlarni rad etdi.
Bu haqda Asia-Plus nashri Tojikiston Din ishlari, milliy an’analar, bayramlar va marosimlarni tartibga solish qo‘mitasi ma’lumotiga tayanib xabar berdi.
Qo‘mita bayonotida ayrim ommaviy axborot vositalarida tarqalgan, go‘yoki mamlakatda hijob kiygan ayollar va uzun soqol qo‘ygan erkaklarga nisbatan jarimalar joriy etilgani haqidagi ma’lumotlar haqiqatga to‘g‘ri kelmasligi ta’kidlangan.
Shuningdek, ijtimoiy tarmoqlar va ayrim nashrlarda jarima qo‘llangan shaxslar keyinchalik tashqi ko‘rinishidagi o‘zgarishlarni tasdiqlovchi suratlarni muntazam ravishda davlat organlariga taqdim etishi shartligi haqidagi xabarlar ham asossiz ekani qayd etilgan.
Tojikiston Din ishlari qo‘mitasi mazkur ma’lumotlarni rad etib, mamlakatda bunday mazmundagi yangi qonun qabul qilinmaganini ma’lum qilgan.
