Toshkentda 3,5 mln dollarlik kredit evaziga 420 ming dollar talab qilgan shaxslar ushlandi
Bank xodimi va uning sherigi kredit ajratish evaziga noqonuniy haq olayotgan vaqtda tezkor tadbirda qo‘lga olindi.
Toshkent shahrida 3,5 mln AQSH dollari miqdoridagi imtiyozli kreditni rasmiylashtirib berish evaziga 420 ming dollar talab qilgan shaxslar qo‘lga olindi. Bu haqda DXX xabar berdi.
Aniqlanishicha, xususiy aksiyadorlik tijorat banklaridan birining Olmazor filiali bank xizmatlari markazi yuristi hamda Toshkent viloyatining Yangiyo‘l tumanida yashovchi, 1979-yilda tug‘ilgan, muqaddam sudlangan shaxs o‘zaro til biriktirib, tadbirkorlik faoliyatini yo‘lga qo‘ymoqchi bo‘lgan fuqaroning ishonchiga kirgan.
Ular fuqaro nomiga 3,5 mln AQSH dollari miqdorida imtiyozli kredit ajratib berishni va’da qilib, buning evaziga kredit summasining 12 foizi — 420 ming AQSH dollarini talab qilgan.
Tezkor tadbir davomida gumonlanuvchilar oldindan 50 ming AQSH dollari olayotgan vaqtida ashyoviy dalillar bilan qo‘lga olingan.
Mazkur holat yuzasidan gumonlanuvchilarga nisbatan jinoyat ishi qo‘zg‘atilib, ularga qamoq ehtiyot chorasi qo‘llanilgan. Hozirda tergov harakatlari davom ettirilmoqda.
