Toshkentda “Yashil to‘lqin” tizimining ilk yo‘nalishi ishga tushirildi
Tizim ertalab shahar markazi, kechqurun esa qarama-qarshi yo‘nalishda ishlaydi va svetoforlarning sinxron harakatini ta’minlaydi.
Yo‘l harakatini tashkil etish markazi mutaxassislari tomonidan Buyuk ipak yo‘li ko‘chasining “To‘ra Buva” masjididan Salom ko‘chasigacha bo‘lgan qismidagi 13 ta chorrahada svetoforlar faoliyati o‘zaro sinxronlashtirildi.
Mazkur tizimga ko‘ra, ertalabki tirbandlik vaqtida “Yashil to‘lqin” shahar markazi tomon, kechki paytda esa qarama-qarshi yo‘nalishda ishlaydi.
Svetoforlarning sinxronlashtirilishi natijasida ushbu yo‘nalishdagi harakatlanish vaqti sezilarli darajada qisqardi. Xususan, “To‘ra Buva” masjididan Salom ko‘chasigacha bo‘lgan yo‘nalishda o‘rtacha harakatlanish vaqti 8,5 daqiqadan 6 daqiqagacha, ya’ni 29 foizga kamaydi.
Shuningdek, Salom ko‘chasidan “To‘ra Buva” masjidigacha bo‘lgan qarama-qarshi yo‘nalishda o‘rtacha harakatlanish vaqti 10 daqiqadan 8 daqiqagacha, ya’ni 20 foizga qisqardi.
Mutaxassislarning ta’kidlashicha, tizimdan maksimal samaraga erishish uchun haydovchilar Yo‘l harakati qoidalari hamda belgilangan tezlik me’yorlariga qat’iy rioya qilishi lozim. Mazkur yo‘nalishda 40–60 km/soat tezlikda harakatlanganda chorrahalarning aksariyatidan svetoforning qizil chirog‘ida to‘xtamasdan o‘tish imkoniyati yaratiladi.
Ayni paytda Yo‘l harakatini tashkil etish markazi mutaxassislari aqlli svetoforlar o‘rnatilgan Toshkent shahrining boshqa ko‘chalarida ham “Yashil to‘lqin” tizimini joriy etish bo‘yicha hisob-kitob va loyihalash ishlarini davom ettirmoqda.
