Tramp Netanyaxuni odatdagidan sovuqroq kutib oldi
AQSh prezidenti va Isroil bosh vaziri o‘rtasidagi taranglik bir necha haftadan buyon davom etmoqda.
AQSh prezidenti Donald Tramp Isroil bosh vaziri Benyamin Netanyaxuni Oq uyda avvalgi uchrashuvlarga nisbatan kamroq iliq kutib oldi. Bu haqda The Wall Street Journal (WSJ) manbalarga tayanib xabar berdi.
Nashr ma’lumotlariga ko‘ra, ikki yetakchi o‘rtasidagi munosabatlarda so‘nggi haftalarda muayyan taranglik kuzatilgan. Hatto Trampning Netanyaxu bilan uchrashuv o‘tkazishga rozilik berishi ham ma’lum vaqtgacha noaniq bo‘lib qolgan.
WSJ manbalarining bildirishicha, uchrashuv arafasida AQSh ma’muriyati Isroil bosh vaziridan Livandagi tinchlik muzokaralarini ilgari surishga jiddiy yondashayotganini amaliy choralar orqali namoyish etishni talab qilgan.
Shuningdek, gazeta Netanyaxuning bu galgi tashrifi avvalgilarga qaraganda siyosiy ta’siri va mavqei jihatidan ancha cheklangan sharoitda o‘tganini qayd etgan. Nashrga ko‘ra, bunga Eron bilan bog‘liq harbiy vaziyat va uning davomiyligi sabab bo‘lgan.
Biroq uchrashuv yakunida Donald Tramp Truth Social ijtimoiy tarmog‘idagi sahifasida Netanyaxu bilan "juda yaxshi uchrashuv" o‘tkazganini va tomonlar ko‘plab muhim masalalarni muhokama qilganini ma’lum qilgan.
O‘z navbatida, Benyamin Netanyaxu Fox News telekanaliga bergan intervyusida mazkur muzokaralarni Tramp bilan o‘tkazgan "eng yaxshi uchrashuvlardan biri" deb baholagan.
